Krótko Notka: Kula&Stanik a Szpas We Wielkim Mieście

Ja, ludkowie rostojmili, dzisiok notka musi być po noszymu, a Gorole mogom sie ciepać, robić afy, a fandzolić.

Wczorej żech sie pod pacha wziena Stanika i bankom żech sie karła do wielkigo miasta na srogi szpas. Stanik to niy je to co baba na cycki zakłodo, alebo tyż może i na cyckach Stanika położyć, ino niy mo to ze buzynhaltrem nic wspólnygo.

Stanik co zy mnom na szpas sie umówiół to je karlus ślonski, co Gorole na niygo godajom Stanisław, a tyn mój Stanik to je kamrat, co zowdy z nim je wiela szpasu, bo durś sie ino śmieje, a fandzoli tak, że jak wlezie we Brühl do bany a zocznie łozprowiać to ani do Köln niy dojadymy, a wszyjstkie we tyj banie som ze śmiychu zejscane. Bez to Kula i Stanik zowdy som we banie chyntnie widziane, bo jak wlezom to sie i Kobuchowi farkarty niy chce sprowdzać i wiela geldu bez to idzie zaoszczyndzić.

Przikludzili my sie ze Stanikiem do cyntrum kultury, kaj sie trefili ludkowie na tyn szpas, co sam o nim bloger @Amstern pisoł:

https://www.salon24.pl/u/amstern/1411375,frele-feat-kobieta-kula-w-imprezie-miast-patrnerskich-k-ln-kattowitz

Nojsompiyrw godali tam o wszyjstkim takie rostomajte Byamtry, ale my ze Stanikiem przyjszli niyskoro to my niy wiedzieli kto to je, ino sie gibko na rzić siedli i czimali pysk, bo tyn istny Byamter we ancugu pieronem cicho godoł, choby sie wstydowoł, abo co.

Kaj skończyli sam godać i fandzolić to my sie poszli napić, bo sam dowali biołe a modre wino, a zaś kaj sie napili to poszli my nazod do tyj kulturhali i podziwiali my trzi Frele co sie ze Katowic przikludziły gryfnie śpiywać. Ze Frelami boł jedyn Klawiyrok, co boł trocha szpotlawy, a Frele zarozki pedzioły, że on mo ała i go boli, a mo holcbajn i bez to taki z niygo boroczek, ale óne jemu srogo przajom.

Zarozki żech to chcioła wyłonaczyć czy to je prowda i my sie ze Stanikiym na Klawiyroka po ćmoku zaczaili, kaj łon cis do haźla i my go obmacali, ale niy mioł holcbajn ino taki wichajster na girze, co jom dochtory dowajom na rekonwalescencjo.

Frele śpiywoły srogo gryfnie i wesoło, a wszyjstkie sie śmioli ino tyn istny Byamter we ancugu boł we poważaniu choby puter na placu, bo to boł Herr Konsul, co je Gorolem i nic niy rozumioł ze tyj ślonskij godki, co je doprowdy srogom gańbom wszyjstkich Goroli, niy ino tych ze regiyrungów.

Potyn, kaj sie szpas skończył, poszli my ze Stanikiym sie ze Frelami pochalać, a winszować srogo i jo żech sie kupiła łode Frelek cydyjka, a dostołach autograf ze serduszkiym.

Stanik sie cydyjki niy kupił ino chcioł autograf na gołe ciało, bo godoł, że Frelom przaje fest i serce mo być przebite strzałom. Dziołcha mu sie podpisoła, serce strzałom mu przebiła, a tyn gizd pieroński potyn we bance sie seblykoł, a wszyjstkim pokozywoł kaj mu Frele przajom, a jo żech siedzioła smyntno choby buła kitu.

I tela. :-)))